第十四天

終於到左日本之旅最後一日，聽日呢個時間已經返到香港；今日冇特別行程，上午去買下野，下午出發去機場


係呢道住左咁多日，終於要講byebye，呢間hostel床位比較大，訓得好舒服，而且我訓下格好方便，日日買到野都方晒係床邊，堆幾多都冇問題


多野到橙色大袋都放唔晒


先將行李寄存係hostel，輕輕鬆鬆去行街


經過郵局入去行左轉，但竟然唔記得買最重要既明信片！唔知當時搞咩呢？


路過吉野家入去食早餐，日本吉野家野食同香港吉野家有啲唔同，香港就冇呢個豆腐早餐，佢唔係好岩我口味，好清啖冇咩味


又行返去大阪站，今日超好天，好清楚見到琴日上過去睇夜景既梅田藍天大廈




第一站上去寵物小精靈中心收復小精靈，呢個係每次去日本既指定動作




佢地係唔係好得意呢？








當日啲人排長龍就為左買呢兩件衫，而家有大量存貨


再落大丸﹑阪急超級市場買生果，日本啲生果樣樣都咁正，都唔知買得邊樣，睇到流晒口水








咩都咁吸引，好想食！






超級市場咁大有排行，唯有係有限時間揀最想買既野


又返到龜王食拉麵


黎呢道係為左你咋，鴨仔Hello






唔玩鴨住食野先，呢碗拉麵只係￥680，又平又好食


食拉麵又點少得替玉呢


原來入地個隻係大阪限量版鴨仔黎架！我隻原本係台灣鴨，而家已經移民左黎香港變成香港鴨，哈哈


邊隻係我既呢？左邊啞色個隻係我，右邊光滑啲個隻係大阪鴨


食飽再去買野，最後返到hostel拎野走啦...（呢張相其實我係想影隻迷你兵）


坐地鐵去到難波站，買小小野之後去到南海電鐵難波站坐車去機場


有錢既話可以坐特急去機場，又快又舒服


我冇錢只可以坐呢啲非特急列車咋，時間耐小小但又平小小（急行列車唔會慢好多，大約47分鐘就到）；話說我見到下班開去關西機場既列車係普通列車，急行列車會係再二十分鐘後先開出，我咪上普通列車坐下囉，心諗時間唔會差好遠掛？不過呢班車好奇怪，係乘換案內APP係冇資料，我都係去到先見到有呢班車




搭左幾個站發覺唔對路，部車站站停，有時又停勁耐讓其他快車行先，咁搞法坐兩個鐘都未必去得到機埸！最後決定係急行列車到之前係其中一個站落車，岩岩好上得返之後開出個部關西空港急行


中途站上車冇位坐，差唔多企到去機場，總算準時到達


Star War列車




今次搭樂桃航空返香港，要轉多程接駁巴士去二號客運大樓


早左兩個半鐘到機場，暫時冇咩人


要先係部機自己印登機證，放passport上去scan就得，唔識都唔怕有職員幫手


拎左登機證之後就整理一下啲行李再排隊將行李寄倉；拎啲行李去磅一磅就知今次大獲！所有行李加埋總共34KG斤，比20KG寄倉加10KG手提行李限額更重，心諗今次麻煩啦，呢道入閘時所有人既手提行李都要磅好難偷到雞；好彩預多左時間到機場，比我慢慢用自己方式法砌到啲行李合要求；今次旅行去得比較長，日日見有野岩就買，結果買到超重！


寄倉時職員問我識唔識講日文同英文，我仲以為發生咩事，原來係想問我願唔願意坐闊啲既緊急出口座位，咁我緊係願意啦，呢個可以算係小小升級掛？


候機室一眼睇晒就係咁大，兩旁有免稅店可以作最後衝刺，不過呢道既職員捉得好嚴，登機閘口職員見到有人買多左野既話，就算只係超過一袋野都唔比你出去，要合標準先可以行，咁做實在太好啦最怕啲人放N咁多袋野霸晒啲行李位


由呢道行出去上機




就咁自己行出去就得，第一次車都唔洗坐自己行上機


緊急出口位睇落闊過普通位一倍都唔只，坐得好舒服，全程好好訓




第十五天

半夜十二點幾返到香港，一齊去既朋友已經係出面等緊我啦，好感動
香港機場等行李出名耐，今次都唔知等左幾耐，等到最後一班返屋企既巴士都開走埋，要坐部迫爆人既通宵巴士去旺角再轉車；拎住咁多野唔敢轉小巴，要再慢慢等巴士返屋企，我覺得自己好叻，竟然可以拎住呢幾袋野行左咁耐！


旅行完滿結束，好耐都未去過十幾日既旅行啦，好滿足；旅程第二個星期係關西冇咩特別，只係有假期得閒冇野做用來攝時間，重點係第一個星期既白川鄉高山個邊，今次係為左「雪」而黎！好在今次運氣唔錯，見到超靚雪景，冇令朋友失望，呢個係我最開心既地方；雪係一樣奇妙既野，經常見到雪既人可能會覺得好煩，但少機會見到雪既人對雪又會好期待，如果可以既話我都想再去睇雪景丫！

< 完 >