< 日本中部﹑關西﹑中國15天遊 > 第十天 連續兩日去左岡山，想去既地方暫時已經去晒，今日唔再去咁遠，只係近近地去京都宇治行下；京都以前曾經去過，不過好多地方都未去，今次可以補返未去又想去既地方啦；而家諗返用「Kansai WIDE Area Pass」去京都其實係好唔抵，應該去遠既地方先抵架，個時冇諗咁多，想去就去lu 已經習慣左早起身，七點幾就醒左，又係一早就出門口；今日天氣好好，落左一日雨再次見到藍天 今朝發生左件神奇既事，話說琴晚返到hostel想搵個遮套但搵極都搵唔到，今日行去火車站途中竟然見到個遮套係路中間，跌左係街一晚都比我執得返，哈哈 大阪去京都好近，唔洗半個鐘就到，8:40開車出發 坐車時間最好就係食野，又係食飯團當早餐 去到京都站再轉車去奈良方向，今次一定要坐普通列車，坐錯快速列車就去唔到目的地！ 好快就到目的地「稻荷站」 黎得呢道個個都係為左「伏見稻荷大社」，一出火車站可以見到大大個鳥居，唔怕搵唔到 伏見稻荷大社入面見到好多狐狸，相傳狐狸係稻荷神既使者 今日天氣超好丫！稻荷神自古以黎就係農業同商業既神明，日本好多地方都可以搵到大大小小稻荷神社，當中呢間伏見稻荷大社係最重要既一間，因為佢係日本全國大約四萬多間稻荷神社既總本社 只係朝早九點半已經好多遊人黎到 超多人 伏見稻荷大社位於稻荷山之上，可以沿路行到稻荷山山頂 我對拜神就冇咩興趣，都係四圍行下睇下 平時神社用來許願既繪馬變成鳥居形狀 好多唔同方式比善信參拜 連蓋朱印都咁多人排隊 經過最多人既大殿，後面有路上山 沿路有好多地方比人參拜 伏見稻荷大社以「千本鳥居」而聞名，鳥居一路由山腳伸延到山上，全條路都係好多好多鳥居 所有人一齊穿過鳥居向山上行，迫到成條路都係人 每行小一段路就有景點參觀，又可以比人休息下 繪馬都特別可愛 繼續向山上行，少左好多人lu 咁靚既風景，吸引好多人寫生 路過一個小湖，又可以休息一下 望到小小山下風景，應該係京都 冇咩人繼續上山lu，頭先下面好熱鬧而家就冷冷清清 行到咁上下我都係時候返轉頭，唔行到山頂咁辛苦啦，都唔知要行到幾時先到，返落山仲好 上山多人行唔快，落山呢條路唔迫人舒服好多 又返到黎啦 伏見稻荷大社外面有條小小商店街，有商店之餘仲有好多呢啲特色小攤檔，要感受呢種傳統風味唔洗等祭典活動，黎呢道就得 一樣可以食到平時食唔到既野架 離開商店街行多小小路，好快就返到稻荷站 係伏見稻荷大社行多兩個零鐘，算係睇晒想睇既野，又行左上半山，不過要我行到上山頂咁辛苦我就懶行啦...呢道係一個好靚既地方，所有建築物都好靚又有特色，一次過睇到咁多鳥居相信只有呢道可以體驗到咋，就算我唔係黎拜神都覺得呢道好值得一遊
|
| 商店 |