作為一個大「月巴」子, 當然就極之鐘意食放題; 當然好多人都不屑放題嘅質素, 覺得一味靠量去取勝, 不過如果想食日本菜食到捧住個肚走, 我諗無返一千幾百一位都幾難落樓！
大喜屋以放題黎講都算中價至上價, 以放題黎講都算係口碑較好嘅選擇 自從舊年帶過屋企兩老去食, 佢地都心思思覺得可以再戰 於是襯星期六嘅下午, 就一於再去食, 佢lunch只係$198/位, 野食同夜晚其實一樣 所以就到時間嘅, 其實lunch去食仲抵
廢話一大輪, 都係時候貼返幾張相 再次唔好意思, 因為掛住食, 所以相就只係影得幾張, 同埋質素十分參差......
刺身黎講都幾多選擇. 最正當然係大大隻赤蝦同有頭甜蝦, 貨真價實 其餘嘅帶子, 三文魚, 油甘魚等等都有正常水準, 而且份量都會黎足
炸物方面都好新鮮, 因為人多而且流量快, 所以實係新鮮炸出黎 芝士年糕同一口芝士簡直係沒有輸的可能, 唯一輸嘅就係我得一個胃 冇得食太多
焗蠔唔算大隻, 佢D醬汁都調得唔錯, 不過如果連蠔加所有醬汁都清晒 都咪話唔滯......當有其他咁多食物選擇, 焗蠔都係一隻起兩隻止, 要黎過過口癮算
天婦羅都有正常水準, 同炸物一樣, 因為人多流量快, 所以實係新鮮熱辣
大喜屋係呢方面都做得幾好, 一直都好足數又冇漏單 正當我以為佢個燒羊鞍會打爛齋砵, 叫極都唔黎漏左單之際, 最恐怖嘅事情就發生左.......
正因為我由入場坐低果刻, 到食左七七八八都仲未有一件羊鞍黎過 所以前前後後我夾埋一共落左3次單, 合共成十幾件燒羊鞍
終於.....終於.....係我叫埋飯後生果準備鳴金收兵之際 Boom一聲十幾件燒羊鞍一炮過拎黎, 仲係新鮮熱辣嘅 (相中就見到我份飯後生果, 同埋部份燒羊鞍)
結果每人盡力食左一兩件都頂唔順, 要忍痛放棄
埋單價隨時同大喜屋差不多
不過大喜屋勝在水準穩定, 同埋D野夠新鮮熱辣 講環境?唔好諗喇, 同大家樂咁上下, 迫迫夾又多人又嘈 要慢慢嘆一定係去食buffet過癮好多
之但係, 講到呢度, 我又想去大喜屋挑戰了.................
|
| 商店 |