哈～去旅行前好忙咁搵資料，去完旅行又忙呢樣，忙果樣。遊記ｄ相，唔知點解，好似執極都執唔完，D遊記一直都出唔到...

又要特別鳴謝有姐、EEChan、盈蝶等等，不斷鞭策我寫文，實在太令人感動！今日我小龍鐘意「的」起個心肝，寫下最近去個既一間新開 BBQ 店 - 大旗嶺樂園

呢排秋風起，天氣涼，係時候去 BBQ，不約而同，有三批朋友/同事都想去 BBQ，又有朋友介紹呢間新開既 大旗嶺樂園，做緊團購$98/位，打去問，我地20幾人，團購位已經full左，但都做緊優惠$118/人，可以燒5個鐘，見佢食物種類多，又可以 BBQ + 碳爐燒 + 打邊爐，真係一次個滿足哂你三個願望。

見佢咁抵，我小龍又咁懶，就一次過安排哂三批朋友都去哂果度 BBQ 。哈～Book場時，連 大旗嶺樂園 負責人Joey都忍唔住問，你無來過，咁有信心，一次過book三場？哈～

由西鐵站行過去，大約10分鐘就到達 大旗嶺樂園，就係尚悅旁邊，門面都幾光鮮易搵

作為先頭部隊，我地 7點就去到 大旗嶺樂園 準備，現場都唔係太多人 BBQ ，場內哥哥即時幫我地開爐，依家用石油氣開爐，BBQ 真係好方便。



呢度網燒多，唔會主動提供燒烤叉俾你 BBQ。不過，要都可以自取，見隔離檔個姐姐即時大叫：「呢d咩服務，嚟 BBQ ，叉都要我地自己整，咁即係點呀！」想用叉 BBQ 既朋友，要留意啦～


嘩～傳說中既碳爐 BBQ，正呀！


先讚下好既一面：

食物方面：種類真係好多，其他 BBQ場 少見既如，三文魚頭、青口、牛舌、豬大腸、秋刀魚、煙鴨胸、雞軟骨串等等，佢都有供應

服務方面：態度一直唔錯，耐心咁盡量幫你解決問題，特別係佢七國咁亂、好多人圍住問佢野既時候



有讚緊係有彈啦！

食物方面：唔講，仲以為自己去左非洲 BBQ，當日全場爆滿，唔知係d燒 BBQ 既人既問題，定 大旗嶺樂園 問題，基本上，食物係嚴重不足，D 食物推出嚟，一分鐘俾人搶哂，最厲害同我一齊夾果個姐姐，一個人夾左半盤青口...有無咁擦得呀？

服務方面：明顯人手嚴重不足、同未熟練，雖然有求必應，不過就真係只係「應」，起碼等半個鐘先處理...

搶呀～搶～食物好唔夠～


飲品方面：係無限量供應，不過無人處理，個桶估計最多裝到200罐，但全場都唔只200人啦，一人一罐，冰凍飲品即時無哂，所以大部份飲品都唔凍(or 凍唔切)

雖然好多問題，當晚我都有朋友好不滿呢間 大旗嶺樂園，但我覺得一大班朋友聚一聚，食物 + 場地對我反而唔太重要，所以果晚都係好開心。當然，如果你對服務好有要求、價錢又要求好平，咁 大旗嶺樂園 一定會令你好失望。

完既時候，食左幾塊厚多士，就好厚多士咁同Joey講下我地有咩不滿，同覺得可以改善下既地方。

雖然果刻唔知佢會唔會改，不過抵讚既，係佢態度一直都好好，仲承諾下次會改善，俾一個全新既 大旗嶺樂園 我睇，我地呢d book左三次，仲買哂飛既，真係拭目以待