之前係SeeWide見到Blogger "Kammy41"嘅攻略講係尖沙咀食韓國野 (http://www.seewide.com/space-article-id-53945-p1.html)
一直以來都咁為食又鐘意食嘅我，即刻就挑起左條癮去試下食餐韓國菜先！
尖沙咀金巴利道果頭係「小韓國」就聽得多，但經過同埋特登去食野又真係未試過
岩岩上星期五，放工約左幾位朋友定期出黎吹水食飯，咁就一於試下韓國菜啦
不過，星期五夜晚嘅尖沙咀，人多雖然都係預計之內，但就無諗過真係間間餐廳都要排隊等左十幾廿張台姐....... =___="
所以，一路行呀行，終於都搵到「漢城」，但都係要等成半個鐘，結果就唔等繼續行去搵食喇
唔覺唔覺，我地都行到去佐敦，諗起佐敦都有間漢城，就一於去馬啦！
點知都係咁唔好彩，舖仔細細，４個人要拎位都唔係易事，反而兩個人就唔駛等位可以即入 同行有位朋友已經係度!@&^!!@#()!&)!#!，咁我只好默不出聲啦 （因為提議食漢城嘅係我 /____" ）
廢ｕｐ左一大論，終於入正題喇！一坐低，當然睇下本ＭＥＮＵ先啦
佢呢套嘅ＭＥＮＵ好簡單，冇套餐，唔算多款但都叫有野食 每樣野都有個Number，價錢同埋張相，你揀岩就咁寫number就得，都算方便呀！
咁我地４個人都叫左５樣野，原本想叫個「豬腸包粉絲」，但落單果時位店員竟然唔想幫我地落呢樣野 仲同我地講： 「小......XXXX...XXXX..XXX」
拿，大家千其唔好誤會，佢唔係講粗口，只係位店員明顯唔係香港人 (疑似係韓國人?!?!?!) 但佢又唔係用英文, 而係用極唔正的廣東話同普通話黎講, 基於我忙住點菜, 所以就剩係聽到個「小字」
事後, 同行朋友就話聽到個店員係講：「佢話呢味菜好小人鐘意食, 所以建議我地唔好點喎」 但我就硬係覺得個店員係話：「呢味菜份量好少，你地唔夠食架」
基於位店員用咁誠懇態度唔想幫我地落呢樣野，所以最後我地都無叫到了
咁我地叫果幾樣野，其實都好大路，分別係： 泡菜餅、韓式炒粉絲、海鮮炒年糕、泡菜豬肉飯同埋紫菜包飯(即係好似壽司卷果隻)
而係未上菜之前，都會有兜小泡菜同酸黃瓜俾大家濕濕口開開胃先 (睇返張單係唔駛錢送的, 唔駛怕酒樓屈你$20 碟 :P)
即刻俾個大合照大家睇下先！
(電話廢+本人影相廢----> 相片質素自然..........)
(咦, 張相清左靚左WO, 緊係啦, 係朋友之後用wtsapp send佢影嘅相俾我咋)
呢味係「泡菜餅」, 黎到果時新鮮熱辣架 味道? um....其實好似係緊"薄撐"咁, 不過係用泡菜味嘅"薄撐"囉 XD 新鮮即食都唔錯嘅, 點埋個醬先更好味, 就咁食就會爭小小味咁
呢碟就係「韓式炒粉絲」 味道十分OK, 亦都好夠乾身, 呢味抵讚！
呢碟就係「海鮮炒年糕」 我覺得全晚最正係佢，果Ｄ汁真係勁香海鮮味 就算我見唔到Ｄ青口同蝦，剩係擺舊年糕同Ｄ汁落口 都絕對感覺到係海鮮年糕，勁讚！
「泡菜豬肉飯」，佢嘅豬肉唔係一塊塊，係好似肉碎但又大粒小小咁 食果陣一啖放晒飯同泡菜豬肉入口會更惹味，味道都ＯＫ，但相對無咁特別
之後果個紫菜包飯(即係好似壽司卷果隻)，佢話俾我地聽「唔好意思，無.....XXX....忙...XXX....即.....」
由於我都係聽唔清楚佢講乜, 但隱約聽到佢個「無」字同「忙」字同「即」字，所以就估佢係話:
「唔好意思啊, 我地今日好忙, 而呢個紫菜包飯係即整, 人手唔夠所以無得整俾你了」
既然係咁, 就唯有結帳啦, 埋單$262, 即係$65一個人, 真係一D都唔貴 :)
總結: 呢篇係我第一篇係SeeWide打嘅長文, 睇返好似真係好長好"尋"氣呢 @@"
總括而言我覺得「漢城」味道同價錢都唔錯，都值得一試嘅！
不過份量方面就唔算多，以一個月巴仔黎講，又點會夠飽呢？
所以仲有後記.....就係轉場再食！
至於轉場去邊？就等下篇攻略再同大家講解啦！
|
| Shop | (--) |