第十二天

唔經唔覺過左十二日，大部份計劃去既地方已經去左，今日開始唔會再去遠既地方，會留返係大阪；一向都覺得大阪係一個大城市，冇風景又冇靚地方去，多數人係大阪都係shopping同食野，所以我對大阪冇咩期望，不過既然一埸黎到就係大阪玩下啦


係大阪玩買張「大阪周遊卡」就最方便，我買左兩日卡只係￥3000，包左大阪地鐵車費同大約三十個景點入埸費，岩晒我呢啲唔知去邊玩又唔想plan既懶人，只要係入面揀地方就得，呢兩日就坐住地鐵四圍去
http://www.osaka-info.jp/osp/cht/

七點幾起身出發，先係hostel附近烏冬店食早餐；呢個醬油烏冬只係￥300，係非常好食，最哀香港冇咩地方有得食烏冬，就算有得食都冇日本呢啲平價烏冬咁好食


細細間烏冬店一半係企位，好快就食完起程


今日可以坐地鐵，唔洗再行去大阪站咁遠；呢兩日都會用到大阪周遊卡，首先第一個用周遊卡去既地方係「大阪城」，坐地鐵去到「森ノ宮站」落車，出左站就見到大阪城啦，不過睇落仲有好遠




大阪城公園範圍認真大，要行到中心先到大阪城天守閣




冬天冇晒樹葉好荒涼








到天守閣之前要過多條河；大阪係歷史上係一個非常重要既城市，因此大阪城係一座又大又宏偉既城堡，係日本三名城之一


真正既美食車


二百年既樹？唔算好大咋？


天守閣九點開門，仲差小小先夠鐘要等多陣




本來冇咩人，突然黎左好多旅行圑，要回避一下


時間夠即刻入場，大阪城天守閣入場費￥600，有周遊卡唔需要比錢，Yeah！






天守閣入面有lift
其實而家見到既天守閣係近代重建，舊既天守閣一早唔係道啦


天守閣入面展示大阪城歷史，豐臣秀吉﹑德川家康之間戰爭等等，詳細內容唔記得啦，只記得大阪打仗時好多人走難去京都




日本歷史唔識咁多，上最高睇風景仲好；天守閣係呢頭算係好高，睇到好遠風景








出面有網圍住，怕人掉野落街？


沿路一層層行落去，繼續上歷史堂


出返黎啦，唔經唔覺係入面行左五十分鐘




出到黎由另一角度欣賞咁精緻既天守閤




時間晏左遊人多左好多，呢道可以算係大阪最重要既地標之一，我估多數人黎到大阪都會黎睇睇（雖然上次我冇黎），由其好多旅行團都黎




原來有個時間錦囊


係時候同天守閣講byebye啦


離開天守閣，行返出黎見到「西之丸庭園」，係一片好大既空地，用周遊卡免費入貴；呢道係大阪其中一個賞櫻聖地，冇櫻花時就冇野好睇，入黎望兩望就出返去lu






入面可以由另一個角度望到大阪城，都算係有小小意義；幻想下全部樹都開滿櫻花係幾靚既呢


由西面離開大阪城公園


路過大阪歷史博物館，可惜今日休息冇開門


坐地鐵去到「四天王寺前夕陽ヶ丘站」，見個名都知道目的地係四天王寺啦；落左地鐵向四天王寺正門方向行去


四天王寺係一間大寺廟，但善信睇落就唔係好多，有啲冷清












呢間似係大殿，係正中間位置




周遊卡包左四天王寺入面兩個要收入場費既地方，包括「本坊庭園」同「中心伽藍」，換左飛可以入場


本坊庭園就係一個小花園，不過冬天都係唔靚










有小小梅花




中心伽藍入面係佛像，唔可以影相，入一入去就出返黎




四天王寺今次冇活動，就只得咁小人咋，連啲小攤檔都冇開






離開四天王寺，可以見到通天閣就係附近，兩個地方之間冇地鐵到只可以行過去，想偷下懶都唔得


係四天王寺同通天閣之間仲有野睇架，天王寺動物園就係正兩者中間，既然路過都不仿入去行過圈，我都好多年冇入過動物園啦，而且用周遊卡入動物園都係唔洗錢，正價要收￥500架


動物園呢啲小朋友地方當然有好多小朋友，入面有好多幼稚園學生黎參觀，個個都勁得意，佢地仲好乖自己食完午餐會執返好所有野，唔會整污漕地方




養左好多動物






係地圖上見到有獅子睇我就一路向住獅子方向行，話晒獅子比較小見而且威猛一啲，不過呢道啲獅子仲懶過我，隻隻都訓晒係道唔郁...冇計啦呢道咁細佢地想行都唔行得去邊




河馬都有丫


冇特別同動物影相，行個圈由正門出返黎；動物園都係岩小朋友同一家大細多啲，我入去望住啲動物都唔知點咁，感覺好奇怪


離開動物園繼續行去通天閣，通天閣附近好熱鬧，有超多人同餐廳，呢道好多餐廳主要食串燒，睇黎呢頭既串燒好出名，當然除左串燒之外仲有好多野食






見到啦！穿過新世界商店街去到通天閣，用周遊卡上通天閣係免費，冇卡就要比￥700咁貴！




通天閣入口好奇怪，要先落去地底再搭lift上，遊人唔多等幾架lift就上到；最煩既係上去之前大家都要係下面影張相，仲會極速係你排隊等lift之前印好比你睇，雖然唔會迫你買不過成件事勁尷尬；講真呢道都冇風景得塊版張相都唔靚，要買都買白川鄉呢啲靚景啦




睇到大阪城市風景，全部都係樓










可以比錢再上去上面觀景台，我就唔上啦




搭lift落返去，有通天閣歷史介紹，第一代通天閣百幾年前就已經有




再落去就係買手信既地方，通天閣好快行晒




通天閣再見


通天閣北面好冷清


阪堺電車有超過一百年歷史，睇落好古老，佢係而家大阪唯一行駛既路面電車


離開通天閣後，去到地鐵「恵美須町站」，坐地鐵離開市中心到去「大阪港站」落車，出站後見到有野食，順便入去食午餐


滿滿一碗牛肉，好豐富


離遠已經可以見到一陣會坐既摩天輪，好大部




唔理摩天輪住，先行去碼頭上船；呢道既「海遊館」都好出名架，不過睇動物既野都係唔太岩我




睇住時間黎行，黎到岩岩好差唔多開船；今次坐呢部「聖瑪利亞號」，原價￥1600，有周遊卡係免費




船倉內有座位，亦都可以上船頂吹風，但要唔怕凍先得，哈哈






船係港口之內航行，睇到大阪市區以外另一種風景








連貨櫃碼頭都見到




企左好耐最後都係入返船倉坐，悠悠閒閒坐到落船


輪到坐摩天輪啦，呢個摩天輪叫「天保山大觀覧車」有112.5米高，比我見過既摩天輪都要大，近睇大得好誇張；摩天輪收費￥800，有周遊卡都係免費，哈哈




摩天輪唔多人坐，中間排隊既係排緊玻璃車箱，唔坐玻璃車箱既話一個人都唔洗排，直接行去上車就得，我就唔玩玻璃車箱呢啲咁得人驚既野！過山車跳樓機我唔怕玩，係好怕坐摩天輪！


上面風景超靚，如果日落時間黎一定更靚








明明好多車箱都冇人，但突然走左兩個人上車，搞到我過唔去另一邊影相，唉...


同佢講byebye啦，都算值得黎坐


坐地鐵返市區，黎到心齋橘行書局同睇衫




買野既時間過得特別快，轉下眼已經天黑，唔怪得好多人shopping可以shop到唔知咩時間啦，哈哈




黎到道頓堀坐呢個觀光船，我諗坐佢欣賞夜景都唔錯




觀光船票價￥900，有周遊卡緊係免費；黎到先知呢道要換船飛上船，我好好彩換到全日最後一張船飛，8:30上船，我走左之後時間牌已經換左做聽日13:00，差啲換唔到飛；其實而家係7:15咋，仲有個幾鐘要等，唯有繼續去買野






八點半前返黎上船，船上有職員應該係同大家介紹兩旁風景，可惜唔識日文唔知佢講咩...




其實都係睇到平時見既景色，冇咩特別


坐完船離開遊客區，去到地鐵站既地下街搵野食；地下街有好多餐廳，重點係價錢平又好食tim，呢個套餐只係六百幾円咋，印象中上次黎大阪都有係呢道食過野


坐地鐵黎到今日最後一個想去既地方，係遠離市區既「住之江公園站」落車，呢個站分成上下兩個站，比較複雜，搞到我都出錯出口又行錯路，好彩行幾步已經發覺唔對路即刻開地圖搵返岩路；夜晚街上好冷清，好少人，呢道係日本唔驚既？


搵岩地方啦，我就係想黎呢道「天然露天溫泉SPA住之江」浸溫泉
溫泉原價￥650，有周遊卡唔洗比錢，自己帶定毛巾就得；夜晚其他地方都關晒門冇野做，黎溫泉就最適合不過




浸完溫泉飲返枝牛奶，舒服到大堂相都唔記得影；呢個溫泉設計好傳統，同之前住既溫泉酒店比呢道浸溫泉既人多啲熱鬧啲，溫泉都多好多，仲有啲得意野玩好似按摩池﹑溫泉床等等，我好鐘意呢道，可以話係周遊卡其中一個必到既地方！溫泉既相可以係呢個網址睇到
http://www.spasuminoe.jp/index.html

睇住地鐵尾班車時間，十一點多啲行返去地鐵站，浸完溫泉舒服晒！住之江公園返市區好遠，尾班車走左會好大獲，唔敢計到咁盡早小小返去等車穩陣啲；呢道坐返去肥後橋站唔洗轉車，二十分鐘返到去，交通好方便


今日真係去左好多好多地方，如果唔係有大阪周游卡好多地方我係唔會去，因為呢張卡我有好多新體驗，試左好多正常唔會做既野，比我由另一個角度欣賞大阪，亦都證明大阪除左行街﹑食飯﹑shopping﹑環球影城之外仲有好多野玩（環球影城我好想去架，但一個人入去未免太毒...），聽日仲會用大阪周游卡，繼續瘋狂去玩，哈哈