上上星期日，我登上富士山山頂！（下） BookFun provide the fastest & lowest price booking

上上星期日，2016年7月11日，我登上富士山山頂最高峰「劍峰」！

身處富士山之中，海拔3400米本八合目之上，已經可以傲視群山，除左本身富士山之外日本已經冇其他山比我更高，比日本第二高山「北岳」仲要高二百米；黑暗中望唔到富士山山頂，我只知道山頂離我好近，就係上面三百米既地方；今次富士山登山之旅終點就係山頂？定最高既劍峰呢？其實呢兩個地方都唔會係大家既終點，大家最終目的地係五合目先真，唔好以為上到劍峰就可以鬆懈，落山先係真係既地獄，我可以講落山流既汗比上山更多！

山小屋咁既環境都唔訓得耐架啦，一點醒左食下早餐做下熱身，太約兩點向山頂出發；溫度只得一度，已經將所有外套著晒上身，相信山頂一定會更凍

滿天星星陪住我上山，好耐好耐都冇見過咁靚既星空，一路上山一路望住咁多星星，感覺好輕鬆自在，呢個世界自然環境真係好靚，只係我地平時比城市蒙蔽而見唔到，難得今日可以遠離城市，隨意抬頭已經可以見到呢個真正世界；我只係拎部DC仔影咋，用眼去感受比呢相張靚更多

由本八合目慢慢行又影下相，二十五分鐘上到八合五勺，位於海拔3450米既吉田/須走路線之中最高既山小屋「御來光館」，好多人都選擇住呢道貪佢去山頂最近；突然諗起一件事，唔知呢道係唔係多人去廁所，呢個廁所有啲臭味，我住既本八合目トモエ館個廁所就勁乾淨咩味都冇，最估唔到係竟然有暖廁所板，天氣咁凍會坐到唔想起身，哈哈

望返去下面，見到好多人一齊努力向山頂前進

再行多二十分鐘，上到3600米既九合目啦，仲有400米路就到山頂！

九合目有座小鳥居同小神社，冇時間停繼續跟大隊慢慢向山頂移動

行行下有個位兩條路二合為一，開始塞左啲人係道，只要行過左就暢通返繼續可以慢慢移動；大隊上山速度唔係好快，行得好舒服，隨左有兩個西方人好心急不停爬頭上山之外，其他人都好有秩序一個跟一個行；不過有時候我想行慢啲都唔得，遇到前面有行山團行行下停低休息，行過佢地之後我無啦啦變左隊頭帶住一大條入龍，幾咁唔好意思即刻行快小小追返上前面大隊

半夜3:10，由本八合目山小屋行左大約一小時十五分鐘，我上到山頂入口既鳥居啦！

黎到呢道可以停落黎抖一抖，靜靜欣賞富士山下呢片美景；除左城市燈光，下山仲有長長一條頭燈燈光向山上移動，好多人一齊向住山頂努力

滿天星星一直陪伴我地

遠方開始見到微微晨光，要上山搵個靚位等待日出

吉田/須走路線山頂終點，位於海拔3710米既「久須志神社奧宮」

山頂呢道好熱鬧，好多鋪頭，有野食有野飲有野買，所以又有「富士銀座」之稱

三點半山頂仲有好多位，好易就搵到一個頭位，靜候一個鐘之後既日出

天色慢慢變光，仲有好多人上緊山！其實上唔到山頂睇口出都唔緊要，沿路都可以睇到日出架，好多人會係山小屋睇完日出先上山；有時候可能山頂睇日出仲冇係下面小屋睇咁好，因為富士山山頂好多時都比雲覆蓋（之前係河口湖就見到咁啦），山頂視野未必有下面咁好；睇唔睇到日出好講緣份，一場黎到我選擇上山頂睇

所有人一齊面向東方，期待呢個日本最高既「御來光」（日本人叫日出做「御來光」）

山頂呢道真係好凍，氣溫低過零度之餘，仲要一路抵受住三號風球既風力，少啲準備都唔掂丫！

4:31，太陽出黎啦！突然後面間鋪頭播啲唔知咩歌，仲一齊大叫「萬歲」！

現場睇日出係靚好多架，我部DC仔影唔到靚相出黎...最靚既景要由對眼去欣賞！

大約十分鐘太陽出晒黎，即刻搵地方避寒；本來係想食返個麵暖暖身，見咁多人等緊開餐都唔知要等到幾時，出去行下好過係道坐

出面都好多人架

而家要圍住火山口行一圈，稱之為「鉢巡」；鉢巡大約要個半鐘時間，途中會經過日本最高峰﹑日本最高郵局﹑日本最高神社等等，咁遠上到黎山頂冇理由唔行既，出發！

向劍峰前進

好多地方都結左冰，證明天氣真係好凍

呢個就係劍峰啦，仲有好遙遠既距離

沿路都係靚景，就好似係天空散步一樣，呢條係日本最高既路！

富士山到而家都被分類為活火山，1707年曾經噴發過，不過可以放心專家估計再爆發既風險好低；富士山話明係一座火山，山中間就有大大個火山口

回望富士銀座，仲係有好多人

呢一刻離天空好近，離頭頂上面飛過既飛機好近，離前面劍峰都越來越近

仲有五百米就到山頂！

去到日本最高既郵局啦！今年山頂郵局營業時期係7月10日至8月21日，時間係上午6點至下去2點；而家時間只係五點半，唯有行埋一邊避避風等佢開門，上到黎一定要入去幫明信片蓋印；呢道好似仲有登山證書賣，我就冇買

挨到郵局開門搞掂所有野，行上小小就係日本最高神社「淺間大社奧宮」

旁邊仲有日本最高既商店，見到有人係入面食杯麵，相信呢個杯麵一定超貴

下個目標劍峰就係前面，仲差小小就到

劍峰之前呢一段路係上山頂最後一個挑戰，條路勁斜所以有「馬背」稱號；路斜都唔係問題，最大問題係路面好多沙石，每行一步起碼向後跌半步，大家都依靠行山杖同欄杆一小步一小步向上行

努力左幾分鐘，成功上到黎啦，可以見到條路有幾斜！

清楚見到好大個火山口

再行上氣象站就係日本最高點

二零一六年七月十一日上午六時三十分，我登上日本最高既地方啦！！！

想同條柱影相要比啲耐性排隊

望住曾經走個既路，呢一刻終於相信，我到左啦！

係山頂影完相，繼續圍住火山口順時針行，完成埋下半部份鉢巡路線

呢道可以見到富士山既倒影

又可以見到山下一片樹林同遠方山脈

一路都係向下行行得好舒服，直到臨尾竟然有段上斜路！雖然對比之前既路係非常易行，但個心明明係諗住落山，突然又要人上斜，內心唔係幾好受...我接受唔到囉！！

另一個角度睇多次火山口

挨埋最後一段上斜，富士山所有斜路都上晒，我可以舒舒服服欣賞眼前美景

啲雲好似綿花糖咁軟綿綿，好想一啖咬落去

行左差唔多兩個半鐘，又返到黎富士銀座；而家少好多人，其實時間仲係好早，只係七點半咋

頭先好多人既餐廳而家靜晒，到我有得開餐啦

呢道食野預左比平地貴好多，呢個烏冬就要￥900；係一個咁凍既地方食到一個熱辣辣既烏冬，你話係幾咁幸福呢，呢￥900抵比啦

睇黎大家好辛苦咁bor

仲有好多人努力向山頂行上黎

山下風景好靚丫

遊人走得七七八八，我都差唔多時間落山

係走之前幫金剛杖燒返個山頂印，咁就完滿啦

大約八點半開始望住個靚景落山

吉田/須走路線有專用既落山路，同上山個條路係唔同；一開始條路係好漫長既「之」字路，一層層向下行

一路對住咁靚既風景行，好唔捨得但又想快啲行落去；一路都係呢啲沙路，一路行一路向下滑，要行得好小心，但見有啲人跑落去勁輕鬆；呢個時間口罩好有用，一行就會有好多沙塵飛起，行人地後面就會不停食塵

山上小屋物資係靠推士機運上去

見到啲人坐係上面都覺得牙煙，因為條路真係好斜

睇相好難感受到路有幾斜，睇下呢部推士機可能了解到小小

一路沿斜路向白雲方向行去

慢慢行中途又掛住影相，用左差唔多個半鐘先去到八合目江戶屋，係呢道吉田路線同須走路線要分開行lu，絕大部份人都會行吉田路線，而我會行須走路線，貪佢可以玩「滑沙」；跟據官方時間，行須走路線落山只係需要三個鐘，而家呢個進度一定冇可能三個鐘行得完，哈哈；越行越熱，我要除低兩件衫再繼續前進

繼續沿沙路向須走口五合目方向前進；頭先係分叉路之前朋友見有位台灣大哥冇行山杖落斜落得好辛苦，就將自己枝杖送左比佢，而家佢冇行山杖都行得好快追佢唔到...某程度係我懶行咁快，哈哈

大約10:10落到本七合目「見晴館」

有成22度，好熱丫！

呢道買野都係貴架啦，但燒印比吉田個邊平，只係￥200咋

而家先落到3200米，仲有落多超過千二米高度先到五合目，感覺好遙遠

佢地上山一定上到好攰；由須走路線上山上升高度比吉田路線高，路又難行，行呢邊辛苦好多

差唔多去到雲層高度啦

望落去好快就要穿入雲入面lu

係見晴館休息左一排又食啲野先再出發，10:45終於去到七合目

呢邊成個山都有呢啲白色小花，仲有好多蜜蜂採花蜜，佢地飛到咁高真厲害

下面間小屋屋頂曬滿綿被，唔怕大霧潮濕既咩？

10:52去到七合目「太陽館」，終於突破三千米落到2960米啦！

見過最後藍天之後要行入大霧裡面lu

離開太陽館之後好快就要挑戰「滑沙道」，可以見到滑沙道係一條直線向下落，而且仲好長tim；行呢條路會有好極端既結果，可能好輕鬆好似滑雪咁滑落去，又可能適應唔到而吋步難行，無論點都好，入左滑沙道就只可以勇往直前，冇得返轉頭架

前面已經有人係滑沙道落緊去，我都準備好啦

就咁睇可能唔覺斜，事實係好斜架，我估有成三十度！呢道全條路都係軟綿綿既沙土，最好玩既地方係每行一步會滑落去幾步，可以行到飛咁快都得，可惜我冇呢個本事，跌左唔知幾多下，只可以保持正常速度滑落去

一有人行過會掦起好大沙塵，我又除左口罩食到成口沙，哈哈

好多日本人真係當滑雪咁玩，當對鞋係滑雪板，所以呢個時間鞋套超級重要，冇鞋套就好似我咁對鞋不停入沙又要不停倒沙，入左石仔仲會好唔舒服；呢張相可以睇到真係好斜架！

當以為滑完沙啦，穿過草叢之後又再滑過，沿路都冇地圖又冇距離指示完全唔知要滑幾耐先到

滑沙都好啲，有時候要穿過碎石，或者遇到大石就好易仆低，成段路都好講注意力同平衡力，開頭我都滑得唔係幾好，慢慢試過同見到其他人點玩之後已經快左好多，不過啲小朋友快我仲多，哈哈

就好似係一個大沙漠之中，所有地方都係沙；可以沿富士山山體直線向下滑，諗起都覺得痴線，而家我就做緊呢件咁痴線既事！

唔知過左幾耐終於見到有指示牌，仲有二百米行完，好野

12:15終於完成滑沙道去到沙拂五合目，身處既高度比吉田口五合目更低，不過距離須走口五合目仲有一段距離

玩得咁辛苦，係間冇開既小屋出面坐低休息下；成身都出晒汗，連外套都濕晒，係道差唔多飲左成枝水！呢個時候可以收埋件外套，只著t-shirt就OK

休息夠要行埋最後既一段山路落山，經過頭先既路，呢啲路都唔當咩一回事啦，好易行

要行呢啲小行山徑，完全冇難度，哈哈

呢條路沿路都冇路牌標示距離仲有幾多，只有不停行不停行，直到見到呢個牌我就知好快到終點啦

軍人都行富士山？

見到間小神社即係仲有幾步就到，加快腳步衝落去

下午一點正，成功到達五合目，順利完成富士山旅程啦，好感動，萬歲！萬歲！

呢道既職員好好人，教我地點坐車離開，又講比我地知開車時間；呢邊只係第二日開放登山，職員仲未見過吉田口既富士山保存協力金個小木牌，係呢邊就算比左錢都冇木牌留念架，哈哈

呢道只有兩間小商店，同吉田口比靜得多，不過都好客得多，一見我行過就送上蘑菇茶，我係第一次飲呢種咁特別既茶架

仲有個幾鐘先開車，坐低食住野等夠鐘

臨尾食返個富士山咖哩飯，呢個冇山上個咁好食！

坐2:30車離開須走口五合目

大約五十分鐘車程去到御殿場JR站，今次行山之旅真真正正結束啦！呢道可以坐巴士或者坐火車返東京都得，我為左慳錢選擇左慢慢坐火車返去

今次富士山之旅好幸運，遇到一個咁靚既天氣，兩日都藍天白雲，風景超靚；亦都好幸運今次可以順利上山落山，而且平平安安冇病冇痛，好值得感恩；自從上過富士山之後，以後睇富士山既感覺變得唔再一樣，永遠唔會忘記當日曾經係富士山頂行過一圈，永遠唔會忘記我曾經上過呢座咁靚既富士山！

~END~

Shop

EEChan2016-07-22 23:06:21	Follow	Report
引用自 '平凡人' 的相片：回覆：美麗的時刻`

Reply Private Message

EEChan2016-07-22 23:07:28	Follow	Report
引用自 '平凡人' 的相片：回覆：好熱鬧啊！

Reply Private Message

EEChan2016-07-23 11:21:09	Follow	Report
很精彩的旅程遊，多謝分享，為你喝釆。

Reply Private Message

林公子2016-07-23 16:05:38	Follow	Report
山上食野唔算貴啦,咖哩先一千,如果比香港人經營,呢碟飯應該會標貴5倍

Reply Private Message

平凡人2016-07-24 12:18:35	Follow	Report
好幸運見到日出
By EEChan on 2016-07-22 23:06:21Post 引用自 '平凡人' 的相片：回覆：美麗的時刻`
Reply Private Message


	Report Why do you report this review? Content is inaccurate/ untrue. Content contains offensive/inappropriate information. Content is spam. Content is repeated. Content violates intellectual property. Content is not related to the merchant and their services. Others Description(Optional)

平凡人2016-07-24 12:19:47	Follow	Report
天氣好，好多人都上到山頂
By EEChan on 2016-07-22 23:07:28Post 引用自 '平凡人' 的相片：回覆：好熱鬧啊！
Reply Private Message

平凡人2016-07-24 12:21:25	Follow	Report
多謝好開心可以順利完成富士山旅程，比預期順利
By EEChan on 2016-07-23 11:21:09Post 很精彩的旅程遊，多謝分享，為你喝釆。
Reply Private Message

平凡人2016-07-24 12:24:13	Follow	Report
日本旅遊景點食野價錢好合理，之前係白川鄉食野價錢同出面基本上係一樣，比著第道可能已經一頸血
By 林公子 on 2016-07-23 16:05:38Post 山上食野唔算貴啦,咖哩先一千,如果比香港人經營,呢碟飯應該會標貴5倍
Reply Private Message

1874飛飛2016-07-24 17:13:47	Follow	Report
能夠完成又看到景色，真幸運！唔知有沒有機會上富士山，看你行程已很不錯

Reply Private Message

林公子2016-07-24 20:11:58	Follow	Report
立山食野都係呢個價

Reply Private Message